«Anoetan elkartuko gara berriro», egin du zin Fermin Muguruzak

Naiz ➝

Anoetara itzuliko da Fermin Muguruza datorren irailaren 24an, Zinemaldian burutuko baita ‘Muguruza FM 40 Tour’ dokumentalaren mundu mailako estreinaldia. «Anoetan elkartuko gara berriro. Memoria ez baita atzera begiratzea: nondik gatozen jakitea baizik, aurrera jarraitu ahal izateko», hausnartu du.

«Futbol zelaitik Belodromora: Anoetan elkartuko gara berriro». Lerroburu horrekin ireki dute Fermin Muguruza eta bere lantaldeak datorren irailan Zinemaldiaren testuinguruan estreinatuko den ‘Muguruza FM 40 Tour’ dokumentalaren inguruan ostiral honetan hedabideetara bidalitako oharra. 

Bertan, gogora ekarri dute irailaren 24ean, ostegunez, 19.00etan izango dela Muguruzak berak Ander Merinorekin batera zuzendutako dokumentalaren mundu mailako estreinaldia, eta musikari irundarraren ibilbidean Anoetak duen sinbolismoa izan dute hizpide, iazko urrian estadio donostiarrean eskainitako kontzertua abiapuntu hartuta: «Egun hartan Anoetako futbol-zelaian egon ginenok badakigu zer zegoen jokoan. Lehen aldiz, euskarak futbol-zelai hura bete zuen artista baten kantuen bidez; lau hamarkada zeharkatu zituzten kantuak, kolektiboki eraikitako memoria eta gaur egun ere hizketan jarraitzen duen historia».

Oraingoan Belodromoa izango da topalekua: 3500 ikusle eta 400 metro koadroko pantaila, Muguruzaren azken biraren kontakizuna elkarrekin bizitzeko. «Baina film honek ere ez du bira bati buruz bakarrik hitz egiten. Berrogei urteko musikaz eta borrokaz hitz egiten du, mugak zeharkatzeaz, topaketez, memoriaz, hizkuntzez eta komunitateez; belaunaldi ezberdinen artean kantu hauek elkargune, identitate eta erresistentzia bihurtu dituzten komunitateez», ohartarazi dute.

Zentzu horretan, gogora ekarri dute Belodromoan ospatu zuela Negu Gorriaken garaipena 2001ean, eta leku berak hartu zuela baita ere ‘Black is Beltza II: Ainhoa’ filmaren estreinaldia 2022an, Zinemaldiaren barruan hori ere. «Eta hara itzuliko gara orain, leku batzuek elkarrekin bizi izan dugunaren memoria gordetzen dutelako eta oraindik kontatzeko istorioak ditugula gogorarazten digutelako», ziurtatu dute.

Dokumentala ikusteko sarrerak salgai daude jada Zinemaldiaren webgunean 8,75 euroan eta dokumentalaren trailer ofiziala ere ikusgai dago. 

Amaitzeko, «irailaren 24an Anoetan elkartuko gara berriro», egin du zin Muguruzak, «memoria ez baita atzera begiratzea: nondik gatozen jakitea baizik, aurrera jarraitu ahal izateko».

Lire l’article original