Fermin Muguruza ft Zeledon

Berria ➝

Fermin Muguruzak eta Zeledonek ‘Sarri, Sarri’ abestia kantatu eta dantzatu dute elkarrekin, Gasteizko txosnetako kontzertuan. Gasteiz «anitza» dela aldarrikatu du Zeledonek oholtza gainean.

Gogoangarria eta berezia izan zen atzo Fermin Muguruzak Gasteizko txosnetan eman zuen kontzertua askorentzat. Izan ere, Muguruzak gonbidatu berezi bat igo zuen oholtzara: Iñaki Kerejazu, Zeledon. Eta elkarrekin abestu zuten Sarri, Sarri abestia, eta baita dantzatu ere.

Abuztuaren 4an jaiei hasiera eman zienean egin zuen legez, aniztasunaren aldeko mezua zabaldu zuen Zeledonek kontzertuan, Gasteiz Anitza mugimenduaren leloa bere eginez: «Gasteiz guztiok egiten dugu. Gasteiz anitza da, eta edozein jatorrik egiten du Gasteiz. Gasteizen bizi garenok egiten dugu gure hiria. Gora Gasteiz anitza! Gora gu eta gutarrak!».

Joan den ekainaren 14an Anoetan emandako kontzertuan iragarri zuen Muguruzak nazioarteko biraren barruan beste lau kontzertu joko zituela doan, eta horietako bat Gasteizko jaietan izango zela, abuztuaren 7an. Ekainaren 28an Euskal Herria Zuzenean jaialdian aritu zen, Arberatzen (Nafarroa Beherea); uztailaren 6an, Arrasaten (Gipuzkoa), Martuteneko ihesaldiaren berrogeigarren urteurrenean; eta hurrengo kontzertua abuztuaren 14an emango du, Irungo (Gipuzkoa) Mosku auzoko jaietan.

Read original article